Welcome!

Hett ja lang genoog düürt…

April 11th, 2012

 

Ja, ‘t is spietelk. Ik hebb de Sied neet good pleegt.

Man mi hett ok nüms anproot.  So wurr disse moje Sied eenfack vergeten.

Nu sall he weer in Gang komen.

All Leden van de SK Weser-Eems sünd upropen, dat se Texten stüren. Un en lüttje Biografie. Un geern ok ‘n Bild.

Daarbi sünd wi egenlik good d’rbi. Hebben uns in de verleden Harvst in Leer truffen, un daar en Book van maakt, dat was to Stapelfeld in d’ Määrt klaar un wurr daar verdeelt, de neet daar wassen, kriegen hum tostüürt.

MASKENDANZ heet dat Wark, mit de Texten ut Leer un mit “Watertexten” in verscheden plattdüütse Dialekten, mooi to verglieken. Un mit Fotografiken van Hans O.E. Gronau, nu ok al weer teihn Jahr overleden.

Token Maal komen wi in Twistringen binanner,
an 20. un 21. Oktober.
Anmellen as alltied bi Manfred Briese.

Birgit Lemmermann haalt KGP 2011!

Mai 26th, 2011

Bit nu kennen wi hör as Schrieverske un “Moder”  van EMIL. Dree Kinnerboken mit de mit de lüttje witte Baar, ‘n heel grote Erfolg. Tüsken Elv un Weser lag een van de Bookjes, timinnst een, up dat Nachtschapp van de Kinner.

2007 gung ‘t dann richtig loos: Se harr de Romaan för junge (un ollerde) Lüü klaar “Ebbe un Hehn” un wunn daar mit de Lüttjepütt-Pries in Bad Bevensen + de Pries “Plattdeutsches Buch des Jahres” van de Töpfer-Stiften un dat INS.

Twee Jahr later, 2009, kreeg se dann de Hans-Henning-Holm-Pries för hör Höörspill.

Ok haalde se eenmaal de eerste Pries bi NDR-Vertell-doch-mal, un de Förderpries (de 2. PLatz, sotoseggen) bi Freudenthal för Körtgeschichten.

Un nu, 2011, weer wat Neeis: Se schrifft Gedichten! Un haalt futt de Klaus-Groth-Pries daarmit.  De Schrieverkring Weser-Eems graleert düchtig!

Neei Kleed för de SK

März 13th, 2011

De Tied löppt so un so gau, un noch gauer in ‘t Internet. De oll Uptreden van de SK was neet mehr good genoog. Nu bauen wi ‘n anner Sied up.

All uns Maten könen en Foto, en Bookvördersied, en körte Biographie un ‘n Text stüren / schicken.  Leevst natürelk as Datei.

Saterdag in Stapelfeld is Gelegenheid, daar over to snacken.  De Baas

Warkeldag in Stapelfeld

März 13th, 2011

Anner Week-Enn komen de Maten van de SK Weser-Ems weer binanner to hör Vörjahrs-Warkeldag in Stapelfeld.

Thema is: China. Maal kieken, wat dat mit uns platte Land to doon hett un mit uns maakt.

‘n heel Rieg moje Texten is al bi de Vörstand ankomen,  dat word weer ‘n lebennig Week-Enn.

Intüsken is ja Japan heel heel aktuell, wi sünd in Sörg.  Man Literatur bruukt ‘n bietje Ofstand.

An dat Schrieverkringswarkeldagweekenn willen wi ok Hein Bredendiek gedenken.

Un uns ok freien over de neje Websieden van de SK, waar ji all inladen sünd, ok up to wesen.